خربشات من الذاكزه

السلام عليكم ورحمة الله وبركاته
اعزائى اسمحوا لي ان اشارككم بعض الخربشات من ذاكرتي الخربه اصلا- وعلى حسب الوقت - كل مره نطل عليكم ونديها شوته شوتين
كلي امل ان اكون خفيفا عليكم واهو محاوله للكتابه لما تجود به ذاكرتي
شكرا لوقتكم مقدما --وسامحوني اذا كنت ضيفا ثقيل الدم
ابدا بمعرفتى بالحاج يوسف
البدايه كانت بدايه 1973 عندما كنت احضر لزياره عمى حسن العطا وقتها كان يسكن مربع 2-بيت عمنا محمد العوض-وكان لسه بيته فى مربع 19 ما اكتمل- كنا نجيب المويه من ماسوره فى الشارع-ما كان لا فى مويه ولا كهرباء- ولا مدارس--ثم اشترينا قطعه ارض في الشقله 1500 متر بمبلغ 150 جنيه تم اقتسامها بين والدي واحد اصحابه-لا اذكر اسمه-دا كان سنه 1976- بنينا غرفه ومطبخ وسكنا في البيت فى مارس 1978- وقتها كنت امتحنت من سادسه المتوسطه- كان اسمها الثانوي العام- المنطقه كانت مقفوله على اهلنا البطاحين- كنا خمسه بيوت يطلق علينا الاغراب او الاجانب- اهلنا البطاحين فى الوقت داك ما ما كان يبيعوا الارض المجاوره لهم بل كان يتركون الاف الامتار بينا وبينهم -الارض ارضهم وهم احرار فيما يفعلون- المهم المويه كانت بالحمير -اكرمكم الله- و البرميل الفرده بي 5 قروش والدبل بي ريال- ثم ارتفع السعر 15 قرش للدبل -محطه الباص كانت الرميه -محطه منجه- مكان المدارس- حاولت خلق علاقات مع اولاد الجيران الفي عمري -نجحت نوعا ما-فى لعب جر العربات والجري باللساتك اما موضوع الكوره ما كان في طريقه- الجماعه ما مستعدين - لذا فضلت الذهاب لاولاد عمي فى الثوره الحاره 12-وهكذا اسبوع في الشقله واسبوع فى الثوره- الى ان فتحت المدارس -كان علي العوده للبلد لتكمله الثانوي العام فى مدرسه الحره المتوسطه-الكتياب-ريفي الزيداب-بين عطبره وشندي- المدرسه كانت داخليه ولاول مره افارق الاسره-

نواصل-
نصحى الصباح بي جرس-الطابور جرس-بين الحصه والحصه جرس -الفطور جرس-الغداء جرس- النوم جرس وبين كل دقه جرس وجرس -هناك جرس- الموضوع ما ركب لي في راسي -قلت للمدير انا عايز انتقل الخرطوم- لسه ما كملنا اسبوع-قال لي يا ابني لازم يجي ولي امرك ويوقع - وكلام كتير كله ما دخل راسي- قلت ليه تمام والدي فى الخرطوم لازم امشي الان ويجي معاي ومن ثم نكمل الاجراءات -
باختصار تم تحويلي من ريف الزيداب الي مديرية الخرطوم وقتها-
عندما احضرت جميع الاوراق كانت كل مدارس الخرطوم فى اجازه-والسبب انعقاد مؤتمر القمه الافريقي- ولنا ان نتسال ما علاقه انعقاد مؤتمر بتعطيل الدراسه

-تخريمه-حدثني صديق كان يدرس فى بريطانيا -انه حتى زياره الملكه للجامعه لا تعطل الدراسه-وانه عندما ياتى المساء ويشاهد فى الاخبار ان زياره المسؤول الفلاني تمت للمؤسسه التعليميه الفلانيه-لكن لا مكان لتعطيل الدراسه--
المهم كان علينا ان ننتظر حتى انتهاء المؤتمر وفتحت المدارس -كانت بالحاج يوسف مدرسه متوسطه واحده فقط-هى الامتداد جنوب- كان الاستاذ محمد الحبيب يدرس وقتها هناك- المدرسه فل وما في اي طريقه- والحل -قالوا الحل نمشي الاهليه بحري-مشينا -برضو المدرسه فل -والحل - خالى الاستاذ شرف الدين الخير الطايف كان مدير العزبه الابتدائيه بحري-صاحبه الاستاذ عوض استاذ في مدرسه كوبر المتوسطه -قال جيبوا الولد بس تجيبوا الكرسي والدرج- بسيطه بقت على كرسي ودرج -محلوله

جبنا الكرسى والدرس-الحصه الاولى رياضيات-الدرس المجموعات -مافي مشكله حلينا التمرين وصححته -كله تمام-الحصه التانيه عربي-الاستاذ القدير الباقر محمد سعيد-دا برجع له بعدين - اهنا حصة الانجليزي- ودا موضوع طووووووييييل -- الحرف S يا للمصيبه الجماعه كانوا سابقني بى كم حرف -وحصص Spellingما تدي الدرب--في ذات اليوم دل الاستاذ محمد الحبيب-الحاج يوسف- ودرسنا حصه العلوم الوحيدة والتي لا انساها حتى اليوم وكان عنوان الحصه -ماهى العلوم- دي الحصه الوحيده التي درسني اياها استاذنا محمد الحبيب ولم احضر له حصه بعد- لكنني اذكره بالخير حتى اليوم-فله التحيه من على البعد
الاستاذ عوض بتاع الانجليزي بقى مقابلني-الراجل صاحب الخال-عطا Spell so and soواخوكم داقي الطناش وما عارف -انا كنت فاضي للعربات وجري اللساتك- وطاخ كف ذي السم على خدي- ايده كانت سمينه جنس سمن- الله وكيلكم تانى الحصه ما افهم فيها التكتحني-وبقيت متعود دايما-حصه الانجليزي اتحضر للكف وكل حصه بي كف طير لي الانجليزي الطيره الياها-غايتو بارك الله في اولاد العم سام الصلحوا لينا الانجليزي-

الرجوع من كوبر كان في الغالب يتم على مرحلتين -المرحله الاولي ملح ياعم الى حلة كوكو والمرحله الثانيه بكسي ام بص او مجروس المهم اي حاجه-مرات كتيره نغشى سوق كوبر وناكل تبش بي قروش الرجعه كلها ونمشي ننتظر ياعم -من ياعم لي عم اخكم يصل الساعه 3-يجي الوالد يقولي مالك ياولد اتاخر -اقوله المواصلات صعبه-يقولي البص الانا جيت فيه من بحري وقف في كوبر وفي حله كوكو- اقول ليه ما كان زحمه ما قدرت اركب -وهو ما عارف قروش المواصالت شالتها ست التبش-مرات تعصلج معانا والملح يخلص -اليوم نشبع كداري او نتوكل على الحي الدايم ونركب البص --يجي المساري طق طق طق تعمل فيها طناش يقوم يقول ياولد انتا دا-مع لكزه على الطاير كده جنباوي - تقوم ترخي صوتك وتعمل فيها مسكين عشان الناس ما تسمع كمان-والله ماعندي- يقوم الكمساري يرفع صوته ويسمع كل الناس -ويقول ليك انت قايل دي تكيه الشيخ ود بدر- تاكلها في حنانك ساكت -يجي صوت الركاب من هناك خليه ياخينا ما دا طالب مسكين- وانت تحت تتبسم بخبث المكنه شالت في الكمساري- ولما تجي نازل يحدر ليك تقول كان شايلك فوق راسه

اهلناالجياشه الله يديهم الصحه والعافيه والله ما قصروا معانا ركبونا المجروس ملح ومن ثم باصات المؤسسه العسكريه وعربات صغيره لا اعرف لها ماركه-غير انها عربيه لابسه كاكي-دي حلوه مش- بس زميلاتنا البنات ما كان طريقه يركبوا-المجروس عالي-سجمي يايمه البركبني الشي العالي دا شنو--بري ابرا واستبرا -انا اركب مجروس لالا
-نخلى اخواتنا ناس بري يا يمه ديل ونركب لوارينا ومجروساتنا
مسؤولين من الخير يا شباب -المجروس وابو رجيله اخبارهم شنو-دا انا من يناير1986 بقيت ما متابع
نرجع للزمن الحلو والايام الطيبه ديك -تعرفوا الوقت دا الناس الراكبين في البص تقريبا كلهم بعرفوا اذا ما الاسماء بالاشكال وبما انني من سكان اخر مطة كنت اعرف ليك معظم الركاب محطاتهم وين- عشان كده تلقاني لابد جنب كراسي ناس مربع 9و10 وناس محطه التعاون- ولا احم ولا دستور تلفاني نزلت في الكرسي زي الجادني بي نبله-لكن الشهاده لله-هاك الهندي عزالدين دا-كنا نقوم للكبير والمريض والوليه الشايله طفل- كان فى احترام للصغير والكبير وكله بي قدره
تعرفوا مرة وبعد اكثر 20 سنه -اتصلت بالاخ والصديق ياسر الصادق-ياسر الريشه-وبعد السلام والتحايا قالي يا عطا نحن كبرنا- اها كيف يا ياسر -قال لي تعرف انا شعري كله بقى ابيض وحتى مره راكب في البص واحد شاب ظريف قالي تعال ياحاج اقعد- قال قلت ليه شكرا يااخوي بس حاج دي كتيره شويه علي انا لسه ما شفت فى الدنيا دي حاجه--ضحكت وودعت ياسر الراجل الظريف صاحب الضحكه الحلوة دايما

ارجع للشقله -كما اسلفت بدانا بي خمسه بيوت اجانب كما اطلقها اهلنا البطاحين علينا وشويه شويه الناس بدت تجي -حسين الدقيل -عباس عبدالباقي -ابراهيم الدقيل-سليمان- ومجموعه كبيره من اهلنا الدناقله والمحس- عباس حسن ومحمد الحسن شيبه وعبدالهادي اخوه-عوض احمد نصر -وعوض-محمد البوليس-وبدات فكرة تكوين مجلس الحله-اول مجلس تم انتخابه كان يراسه صديق محمد شنقول وكان هم المجلس الاساسي في تلك الفتره صهريج الماء-تم الاتفاق على جمع التبرعات بواقع خمسه جنيهات لقطعة الارض-مسكونه كانت ام خاليه-وبدا الجمع والكل همه تثبيت الشقله كقريه تجنبا لمسالة السكن العشوائي-اتفق على ان يكون صهريج الماء على حدود القريه -في فترة وجيزه تم جمع المال وبدا حفر البئر ووضع الصهريج -لا ادري اين موقعه الان لكنه كان على الطريق الرئيسي المؤدي لشارع الردميه-بعد عام اجتمع المجلس المنتخب للمحاسبة وانتخاب مجلس جديد-بسؤال رئيس المجلس السابق عن الحسابات-والتي كان امينها ايضا-قال قولتة المشهورة-انا راجل بخدم البلد دي وباكل ياكل غيري الصهريج دا انا ما جبته بي اخوي واخوك الصهريج دا انا دفعت لي ناس عشان يصدقوه والان انا ما عندي ليكم حساب ولا قروش دايرين المحاكم هلا سهلا-وكان ما اراد لا حساب ولا يحزنون والناس تاني بدات تجم من جديد لتمديد المواسير والجامع -وبدات المتواليات ثم المدرسه الابتدائيه والتي اول مدير لها الاستاذ عبدالقيوم السماني-مربع 3-ادم جابر والاستاذه عواطف
كان اهلنا البطاحين هم من يملكون الاراضي ويتم تمتير الارض باستخدام القدم-الشبحه-وصاحب الارض هو الذي يحدد المساحه -الشوارع المحيطه والاراضي المجاوره
الاستاذ المحامي عبدالرحمن حسين الدقيل كان رفيق الصبا وانا اكبر منه بعام او عامان-بدانا نلعب الدافوري مع جيراننا عباس حسن وعوض عبدالحميد-الان سكان 16-واخيرا جانا من مدني ابن خالتهم عبدالعظيم بابكر يوسف-ايضا من سكان مربع 16 اليوم-والسعوديه حاليا-وقتها لاول مره اسمع بالتركين والملوحه والفسيخ-تصور واحد من عرب ريفي الزيداب وين شاف والله سمع بالمصطلحات دى-دا نحن ناس عصيده وكسره وبس- لكن لم اتذوق الملوحه الا لاحقا فى بيت ناس علي شريف -مربع15-محطة مجاهد-

المهم بدات شخصيتي تتكون والاختلاط بالناس بدا في ازدياد -علي ما اظن اصبحت من الوجوه المعروفه في الشقله- لم يكن هناك نشاط سياسي ولا كنت افهم في ولا تى الان-رئيسكم مين -نميري- قائدكم مين -نميري-وهكذا
كنت استمع للاذاعه حضرت معظم الحفلات الاذاعيه والتي كانت تقام في حدائق الاذاعة وقتها- اول حفل حضرته كان فيه الفنان المرحوم عبدالعزيز محمد داؤد-لا حوله دا انت قديم قدم-امال ايه دا انا اقولك مربع 2 المويه كانت ماسوره عمويه-تقول لي عبدالعزيز داؤود-
هلال مريخ دي يا كنا تشوفها في التلفزيون -ابيض واسود طبعا-او صدفه اكون مع اولاد عمي في الثوره نمشي استاد الهلال كداري
اول مره دخلت استاد التحرير كانت مدرسه كوبر لاعبه ضد احدى مدارس بحري-خليل نورالدين-مربع 11 كان احد اعمده فريق المدرسه وكنا نغني ليه-يا خليل يا خليل خليلك وين ما بنوم الليل -الليل الليل الليل علي طويل انا
الطلبه في الشقله كانوا يتعدوا بي اصابع اليد-عبدالرحمن الدقيل وكان جاي من مربع 5 على ما اذكر-الاستاذ ادم جابر-الاستاذ المحامي الله جاد موسى -وكان اكبر مننا -كان ما شاء الله طويل ويلبس الردى السماوي الفاتح مع القميص الابيض لبس الثانوي وقتها- لكن لما دخلنا الثانوي العالي كان بنطلون بني غامض مع قميص ابيض-
هؤلاء كانوا طلاب الشفله وقتها-
في كوبر كان دفعتي بالاضافه لاولاد الحاج يوسف اللي ذكرتهم-كان من سكان كوبر وقتها امير عبدالله-انتقل للحاج يوسف القديمه-عادل حامد -الشقله- سراج الدين عثمان واخوه سيف الدين عثمان-اتصور ان لم تخونني الذاكره ساكنين مربع
6

ذكر احد الاعضاء هنا معهد القرشي- والاساتذه المرحوم الشاعر الفذ ابوذر الغفاري-الاستاذ اسماعيل الاعيسر - كنت احضر الامسيات الادبيه التي كان المعهد برفقة الاستاذ الهادي الكنزي -ابن عمتي-واستمتعت كثير بابداعات ابوذر الغفاري الذي كان مبدعا بالفطرة في كل عمل يؤديه -تعرفت من خلالهم على الاستاذ محمد خير عبدالله والذي توطدت علاقتي به اكثر في معهد التقدم مع الاستاذ التجاني والاستاذ طارق صديق
الشقلة كانت كل سنه تزداد ازدحاما وانتقلت المحطة الاخيره في شارع الردميه الي نهايه الشارع وبي كده ازدادت المواصلات قربا لاهل الشقله -سميت المحطه بمحطة ود النصيح واطلقت اسرة وليد حسين مربع 12 هذا الاسم تيمنا بالشيخ ود النصيح وهذا لم يقلل من اهمية محطة المدارس شمال -كبر عمل العم منجه ومن طبليه لبيع السجاير والحلوى والبرسيم بعد الظهيره الى كشك حدادي مدادي ثم ازداد عدد الاكشاك وخاصه التى تعمل عشاء وهنا اتذكر الاستاذ محمد احمد العندي -الاستاذ بمدارس كموني الخرطوم حينها- وكان يقول لينا الفول دا ما في احسن منه وكانت وجبته المفضله فول
الاستاذ محمد احمد العندي من ابناء دار العوضه والي منهم مجموعه كبيرة جدا ساكنه محطة اليافطه ومنهم عماد عبدالرحيم مربع11-علي شريف مربع 15-عبدالعظيم بابكر يوسف -مربع 16-طارق السر و ابراهيم كديس -مربع 3- ملك فضل الشقله -في فترة كنت بلعب معاهم دافوري وكنت الوحيد اللي ما من دار العوضه-وما انسى شيخهم الكبير فيصل العندي-دا براه كان راجل ابداع والباشمهندس نجم الدين عكاشه والاستاذ شوقي عكاشه المحامي فتحياتي لكل ابناء دار العوضه فى كل مكان والذي اعتبروني واحد منهم -الاخ علي شريف كان يقول لي ياعربي يابتاع الشقله انت القرايه عايز بيها شنو بكره تمتحن الشهاده السودانيه وتركب ليك بكسي او حمار وتجي تبيع لينا اللبن-

المرحوم ابوذر الغفاري بعد تركه لمعهد القرشي فتح معهد عازة في الحاج يوسف القديمه -لكن الامور ماشت كما يريد وقفل معهد عازه-الاستاذ الاعيسر لم اقابلهمن ايام معهد القرشي وربما لا يذكرني حتى لاني كنت حاجه صغيره كده لا تلفت النظر

مع خربشات من الذاكرة لكم مني كل التحايا واعذروني مرة اخرى اذا كنت ضيفا ثقيلا عليكم
علي فكره لاول مره اكتب في منتدي بالرغم من قراءتي وبنهم شديد لمعظم المنتديات السودانيه واكاد اعرف معظم الشخصيات السودانيه على الانترنت-معرفه قارئ فقط - اقرء ثم اقرء ثم اقرء-لكنني لاول مره احاول الكتابه معكم
فاعذروني لاني برلوم كتابه
وعلي فكره استخدم كي بورد Sudaneseonlineلذا الغلطات الاملائيه لا اقدر على اصلاحها-- فاعذروني مره اخرى
http://www.sudaneseonline.com/arabickey/index.shtml
ولنا عودة الاسبوع القادم--
وخالص حبي لكل من سكن الحاج يوسف وشاركنا هذا السودان المصغر-كما قال الكاتب المبدع صلاح شكوكو