للنقاش ( ادخل قول رايك)

وممثلنا في السعودية مصطفي سعيد

الاخ العزيز / اوبة

تحياتى الحارة وكل الود

اشكر لك اولا هذه المبادرة بخوضك فى موضوع حساس وهو ما يتعلق بالسياسة وامر الناس ، ومنذ فترة دخولى بهذا المنتدى لم اشاهد احدا يتجرأ ويطرق هذا الباب وهو الاهم فى نظرى لأننا مرتبطون بأهل هذا البلد حتى لو هاجرنا وسافرنا دونا عن شعوب العالم الاخرى وهمومنا بقضايا اهلنا ومصالحهم لا تنفك ابدا لانك ملزم تجاه اسرتك الصغيرة والكبيرة ضف على ذلك اصدقائك وجيرانك ، فكل من لك به معرفة فقط عندما يحتاج اليك لمصاب ألم به فأنت تقدم له الخدمة وانت راغب وان ضن عليك الزمان فلسوف تستلف حتى تعين المحتاج وان حال الامر فأنت تكون صغيرا فى نظر نفسك ،،،،

وموضوع الخدمة والخدمات موضوع طويل فى نظرى عزيزى ابه لانه متشابك ومتشعب وسيضيف الى هذا البوست مواضيع اخرى وهذا امر جيد وليس بالسئ وسأخذ على سبيل المثال بعض الخدمات وهى الصحة والتعليم وحقوق المواطنة والصحة والتعليم يعتبران استثمار طويل الاجل يعنى بعد عشرين سنة كده بتحصل نتيجة الخريجين يعنى بتصرف الليلة وبتزرع عشان تحصد بكرة ، والواضح للعيان ما آل اليه الحال فى هاتين الخدمتين بارتفاع كبير فى اعداد الفاقد التربوى يعنى الماعنده قروش ما يقرأ والموضوع ده بسوقنا لى موضوع فرعى تانى وهو الفقر ( لو كان الفقر رجلا لقتلته)*سيدنا عمر ، وده ممكن يقودنا الى انه الناس مقصودة انها تقبع فى حالة من الجهل واللاوعى والا شنو القصة ؟ وضيف على كده ياكافى البلاء الناس تموت بالملاريا وللاسف حق العلاج يكون ما عندها ، ما تقول لى البركة فى وزيرة الصحة العملت علاج الملاريا مجانى وذكرت الملاريا فقط على سبيل المثال ده غير نسبة انتشار الايدز الخيالى وده ناتج من شيئين بعد الناس عن الدين وسوء الاحوال الصحية من نقل الدم وغيره ، انت عارف يابه شهر رمضان القبل الماضى 1427ه عندنا مرة قريبتنا اتوفت وهى بتنجب فى طفلها فى الولاية الشمالية دنقلا ، والسبب انه حولت لمستشفى دنقلا وما قدرت توصل للمستشفى انت عارف ليه لانه البنطون كان معطل وياريته لو كان واحد العاطل عن العمل بل ثلاثة معديات خربة بفعل القدر ام بفعل الزمن ام بفعل فاعل الله اعلم وخليك من الحالات التانية والكتيرة الما بذكرها لو قلنا ما عندك قروش ما بتتعالج طيب ده عنده قروش يشترى بنطون ومعدية عشان يصل المستشفى والا شنو ،ولو اشترى انت بتخليهو فى حالو ،غايتو

(حال ما ها حال قدرتنا تبقى على العدو وصرمتنا تبقى على الجبال)

حميد * نحنا ما دخلنا الحكومة ولا عارفين تصرفاتها دى نابعة من اى اساس لكن طلعنا برة البلد وشفنا الناس عايشة كيف ومستوى الخدمات المقدم للمواطن بالجد الواحد بقى يختشى على حال بلده وحال اهله ياخى العطالة عندهم رواتب وده ما تشجيع للعطالة لكن ادى الناس فرص العمل وخليها تتعلم زى ما الكيزان يتعلمو وخليها تشتغل ما تقول ليك مين البزكيك وبدون خجل عشان تشتغل لازم تزكية ولازم خدمة الزامية ويقولو ليك ده حق البلد طيب البلد قدمت لى شنو عشان انا اقدم ليها ؟ وللاسف الكوز بكون خلص الخدمة الالزامية من غير ما يعمل اى حاجة وغيره لازم يقوم بالخدمة ، ومن دون ذكر اسماء عندنا زملائنا خلصو الخدمة ونحن لسع بنقرأ ده يسموهو شنو ؟ واشتغلو ونحن حايرين فى بلاد الله والحمد لله على كل حال . لانه الارزاق ما عند الكيزان ! القصة ياابه والموضوع طويل والخدمات المفقودة كتيرة وانا بتمنى واحد يدخل البوست يقول لى الخدمة الفلانية تمام ، اللهم التمام الا فى الجيش والجيش زاتو بقى شنو ما بعرف لانه برضو اتسيس للاسف ؟

ياخى الموية البنشربها فى مشكلة نحن رحلنا من المايقوما عشان مشكلة الموية كسبب من ضمن الاسباب ومشكلة الموية فى المايقوما خلى ناس المايقوما يشرحوها ليك ابتداءا من انفصال اللجان الشعبية وانتهاء بفصل موارد المياه والصهريج الرئيسى (اللجان الشعبية) ؟ معقولة بس !

ياخى ياابه الحرقة بتخلى الواحد ما قادر يركز فى السرد أو بالاصح ممكن نقول كبر حجم الخدمات المفقودة بتخلى الواحد يتفرع بالحديث ويتلخم من كتر المصايب الواقعة على اهلنا وما قادرين يتحلو منها وممكن الناس اتعودت على المشاكل وبقت ما بتفكر فى الحلول الا لما تكون فى مشكلة يعنى الناس سايباها على الله خالص اتكالية شديدة وما دايرة تعمل شى خالص ولا دايرة تعرف حقوقها من واجباتها ،

مع انه عارفين الله عادل وما فى ظلما جاى منو والرسالات السماويات جميعا" عادن الجوع حرمنٌه ، الا ما دام فينا حرقه وفينا فورة دم غبينة ، من نبينا نعز وطنا ومن وطنا نعزٌه عالم بى محبة سلام سكينة ونبنى مجدنا نبتة نبتة وطينة طينة * حميد

وده برضو بودينا لى موضوع السلام والامن ولسع ما خلصنا موضوع الصحة والتعليم بما يخص الولايات وخاصة الشمالية لاننا ننتمى اليها و من غير ما نخوض فى الشى الحاصل فى دارفور والشرق والجنوب واسباب الصراع وظهور القبلية والانتماءات الجهوية من جديد ؟

الخص القول فى اننا هل نحتاج الى حزب سياسى ام الى قادة وطنيين فى الحكم ؟

التساؤلات كثيرة والاجابات مختلفة ومتنوعة ؟ لكن لابد من الحديث والمفاكرة حتى نستفيد فكلنا قاصرون مهما اتيحت لنا من فرص التعليم والمعرفة!

التحية مرة اخرى لشجاعة الاخ ابه وهذا عهدى به

والتحية للجميع ونرجو المساهمة والتوضيح والنقد ان كان هناك خطا فى السرد او الصحة

وسنعود حتما" ولابد

وفى انتظار قهوة الصباح

مستوى الخدمات الذى تقدمه الحكومة السودانية للمواطن السودانى سيئة الى ابعد الحدود

الاعزاء / ابه ومحمد نجيب

كل الود والتقدير

الظاهر كل اعضاء المنتدى ينعمون بالخدمات الطيبة والممتازة وان كان ذلك حقا" فهم من الكيزان وان كانو كذلك فاين المانع من القول وابداء الراى ، والساكت وماداير يبدى بى راي اعتقد انه ده برضو ناتج من الخوف من سلطة النظام او على قول المصريين مكبرين دماغهم خالص والموضوع ده ما موضوع معارضة والا مناصرة ده موضوع مشاركة والقصد من الادلاء بالراى وعدم السكوت هو الوصول بالحال من السئ الى الافضل ياشباب ، وانتو بى القول بس برضو بتبخلوا والله بالجد شئ مؤسف

وتحياتى فقط؟؟؟؟ لمحمد حسن وحسن ابه